oure parties o this half, for the rowndenesse of the erthe, of the whiche I have towched to zou before.  For oure Lord God made the erthe alle round, in the mydde place of the firmament.  And there as mountaynes and hilles ben, and valeyes, that is not but only of Noes flode, that wasted the softe ground and the tendre, and felle doun into valeyes:  and the harde erthe, and the roche abyden mountaynes, whan the soft erthe and tendre wax nessche, throghe the water, and felle and becamen valeyes.

Of Paradys, ne can not I speken propurly:  for I was not there.  It is fer bezonde; and that forthinkethe me:  and also I was not worthi.  But as I have herd seye of wyse men bezonde, I schalle telle zou with gode wille.  Paradys terrestre, as wise men seyn, is the highest place of erthe, that is in alle the world:  and it is so highe, that it touchethe nyghe to the cercle of the mone, there as the mone makethe hire torn.  For sche is so highe, that the flode of Noe ne myght not come to hire, that wolde have covered alle the erthe of the world alle aboute, and aboven and benethen, saf Paradys only allone.  And this Paradys is enclosed alle aboute with a walle; and men wyte not wherof it is.  For the walles ben covered alle over with mosse; as it semethe.  And it semethe not that the walle is ston of nature.  And that walle strecchethe fro the southe to the northe; and it hathe not but on entree, that is closed with fyre brennynge; so that no man, that is mortalle, ne dar not entren.  And in the moste highe place of Paradys, evene in the myddel place, is a welle, that castethe out the 4 flodes, that rennen be dyverse londes:  of the whiche, the first is clept Phison or Ganges, that is alle on:  and it rennethe thorghe out Ynde or Emlak:  in the whiche ryvere ben manye preciouse stones, and mochel of lignum aloes, and moche gravelle of gold.  And that other ryvere is clept Nilus or Gyson, that gothe be Ethiope, and aftre be Egypt.  And that other is clept Tigris, that rennethe be Assirye and be Armenye the grete.  And that other is clept Eufrate, that rennethe also be Medee and be Armonye and be Persye.  And men there bezonde seyn, that alle the swete watres of the world aboven and benethen, taken hire begynnynge of the welle of Paradys:  and out of that welle, alle watres comen and gon.  The firste ryvere is clept Phison, that is to seyne in hire langage, Assemblee:  for many other ryveres meten hem there, and gon in to that ryvere.  And sum men clepen it Ganges; for a kyng that was in Ynde, that highte Gangeres, and that it ran thorge out his lond.  And that water is in sum place clere, and in sum place trouble:  in sum place hoot, and in sum place cole.  The seconde ryvere is clept Nilus or Gyson:  for it is alle weye trouble:  and Gyson, in the langage of Ethiope, is to seye trouble:  and in the langage of Egipt also.  The thridde ryvere, that is clept Tigris, is as moche for to seye as faste rennynge:  for he rennethe more faste than ony of the tother.  And also there is a best, that is cleped Tigris, that is faste rennynge.  The fourthe ryvere is clept Eufrates, that is to seyne, wel berynge:  for there growen manye godes upon that ryvere, as cornes, frutes, and othere godes y nowe plentee.