condiciouns, and therewith alle rightfulle; and also that he be of gret age, and that he have no children.  In that yle men ben fulle rightfulle, and thei don rightfulle iuggementes in every cause, bothe of riche and pore, smale and grete, aftre the quantytee of the trespas, that is mys don.  And the kyng may nought deme no man to dethe, with outen assent of his barouns and other wyse men of conseille, and that alle the court accorde therto.  And zif the kyng him self do ony homycydie or ony cryme, as to sle a man, or ony suche cas, he schalle dye therefore; but he schalle not be slayn, as another man, but men schulle defende in peyne of dethe, that no man be so hardy to make him companye, ne to speke with hym, ne that no man zeve him ne selle him ne serve him nouther of mete ne drynk:  and so schalle he dye in myschef.  Thei spare no man that hath trespaced, nouther for love ne for favour ne for ricchesse ne for noblesse, but that he schalle have aftre that he hathe don.

Bezonde that yle, is another yle, where is gret multytude of folk; and thei wole not for nothing eten flesche of hares, ne of hennes, ne of gees:  and zit thei bryngen forthe y now, for to seen hem and to beholden hem only.  But thei eten Flesche of alle other bestes, and drynken mylk.  In that contre, thei taken hire doughtres and hire sustres to here wyfes, and hire other kynneswomen.  And zif there ben 10 or 12 men or mo dwellynge in an hows, the wif of eyeryche of hem schalle ben comoun to hem alle, that duellen in that hows; so that every man may liggen with whom he wole of hem, on o nyght.  And zif sche have ony child, sche may zeve it to what man sche list, that hathe companyed with hire; so that no man knoweth there, whether the child be his or anotheres.  And zif ony man seye to hem, that thei norrischen other mennes children, thei answeren, that so don other men hires.  In that contre and be all Ynde, ben gret plentee of cokodrilles, that is the maner of a longe serpent, as I haye seyd before.  And in the nyght, thei dwellen in the watir, and on the day, upon the lond, in roches and caves.  And thei ete no mete in all the wynter:  but thei lyzn as in a drem, as don the serpentes.  Theise serpentes slen men, and thei eten hem wepynge:  and whan thei eten, thei meven the over Jowe, and noughte the nether Jowe; and thei have no Tonge.  In that contree, and in many other bezonde that, and also in manye on this half, men putten in werke the sede of cotoun:  and thei sowen it every zeer, and than growthe it in smale trees, that beren cotoun.  And so don men every zeer; so that there is plentee of cotoun, at alle tymes.  Item, in this yle and in many other, there is a manner of wode, hard and strong:  who so coverethe the coles of that wode undir the assches there offe, the coles wil duellen and abyden alle quyk, a zere or more.  And that tre hathe many leves, as the gynypre hathe.  And there ben also many trees, that of nature thei wole never brenne ne rote in no manere.  And there