KATE O’ GOWRIE.[37]
TUNE—"Locherroch Side."
When Katie was scarce out
nineteen,
Oh, but she had twa coal-black
een!
A bonnier lass ye wadna seen
In a’ the
Carse o’ Gowrie.
Quite tired o’ livin’
a’ his lane,
Pate did to her his love explain,
And swore he ’d be,
were she his ain,
The happiest lad
in Gowrie.
Quo’ she, “I winna
marry thee,
For a’ the gear that
ye can gi’e;
Nor will I gang a step ajee,
For a’ the
gowd in Gowrie.
My father will gi’e
me twa kye;
My mother ’s gaun some
yarn to dye;
I ’ll get a gown just
like the sky,
Gif I ’ll
no gang to Gowrie.”
“Oh, my dear Katie,
say nae sae!
Ye little ken a heart that
’s wae;
Hae! there ’s my hand;
hear me, I pray,
Sin’ thou
’lt no gang to Gowrie:
Since first I met thee at
the shiel,
My saul to thee ’s been
true and leal;
The darkest night I fear nae
deil,
Warlock, or witch
in Gowrie.
“I fear nae want o’
claes nor nocht,
Sic silly things my mind ne’er
taught;
I dream a’ nicht, and
start about,
And wish for thee
in Gowrie.
I lo’e thee better,
Kate, my dear,
Than a’ my rigs and
out-gaun gear;
Sit down by me till ance I
swear,
Thou ‘rt
worth the Carse o’ Gowrie.”
Syne on her mou’ sweet
kisses laid,
Till blushes a’ her
cheeks o’erspread;
She sigh’d, and in soft
whispers said,
“Oh, Pate,
tak me to Gowrie!”
Quo’ he, “Let
’s to the auld folk gang;
Say what they like, I ’ll
bide their bang,
And bide a’ nicht, though
beds be thrang;
But I ’ll
hae thee to Gowrie.”
The auld folk syne baith gi’ed
consent;
The priest was ca’d:
a’ were content;
And Katie never did repent
That she gaed
hame to Gowrie.
For routh o’ bonnie
bairns had she;
Mair strappin’ lads
ye wadna see;
And her braw lasses bore the
gree
Frae a’
the rest o’ Gowrie.
[37] See postea, in this volume, under article “Lady Nairn.”
UPON THE BANKS O’ FLOWING CLYDE.[38]
Upon the banks o’ flowing
Clyde
The lasses busk
them braw;
But when their best they hae
put on,
My Jeanie dings
them a’;
In hamely weeds she far exceeds
The fairest o’
the toun;
Baith sage and gay confess
it sae,
Though drest in
russit goun.
The gamesome lamb that sucks
its dam,
Mair harmless
canna be;
She has nae faut, if sic ye
ca’t,
Except her love
for me;
The sparkling dew, o’
clearest hue,
Is like her shining
een;
In shape and air wha can compare,
Wi’ my sweet
lovely Jean.