The setting sun, the setting sun,
      How glorious it gaed down;
    The cloudy splendour raised our hearts
      To cloudless skies aboon! 
    The auld dial, the auld dial,
      It tauld how time did pass;
    The wintry winds hae dung it down,—­
      Now hid ’mang weeds and grass.

THE HUNDRED PIPERS.[59]

AIR—­"Hundred Pipers."

    Wi’ a hundred pipers, an’ a’, an’ a’,
    Wi’ a hundred pipers, an’ a’, an’ a’,
    We ’ll up, and we ’ll gi’e them a blaw, a blaw,
    Wi’ a hundred pipers, an’ a’, an’ a’. 
    It is ower the border, awa’, awa’,
    It is ower the border, awa’, awa’,
    Oh, we ‘ll on, an’ we ‘ll march to Carlisle ha’,
    Wi’ its yetts, its castel, an’ a’, an’ a’.

    Oh, our brave sodger lads look’d braw, an’ braw,
    Wi’ their tartans, their kilts, an’ a’, an’ a’,
    Wi’ bannets an’ feathers, an’ glittrin’ gear,
    An’ pibrochs soundin’ sae sweet an’ clear. 
    Will they a’ come hame to their ain dear glen? 
    Will they a’ return, our brave Hieland men? 
    Oh, second-sighted Sandie look’d fu’ wae,
    An’ mithers grat sair whan they march’d away. 
                Wi’ a hundred pipers, &c.

    Oh, wha is the foremaist o’ a’, o’ a’? 
    Wha is it first follows the blaw, the blaw? 
    Bonnie Charlie, the king o’ us a’, us a’,
    Wi’ his hundred pipers, an’ a’, an’ a’. 
    His bannet and feather, he ’s waving high,
    His prancin’ steed maist seems to fly;
    The nor’ wind plays wi’ his curly hair,
    While the pipers blaw up an unco flare! 
                Wi’ his hundred pipers, &c.

    The Esk was swollen sae red an’ sae deep,
    But shouther to shouther the brave lads keep;
    Twa thousand swam ower to fell English ground,
    An’ danced themselves dry to the pibroch sound. 
    Dumfounder’d the English were a’, were a’,
    Dumfounder’d they a’ heard the blaw, the blaw,
    Dumfounder’d they a’ ran awa’, awa’,
    Frae the hundred pipers, an’ a’, an’ a’. 
                Wi’ a hundred pipers, &c.

[59] “Charles Edward entered Carlisle preceded by a hundred pipers.  Two thousand Highlanders crossed the Esk, at Longtown; the tide being swollen, nothing was seen of them but their heads and shoulders; they stemmed the force of the stream, and lost not a man in the passage:  when landed, the pipers struck up, and they danced reels until they were dry again.”—­Authentic Account of Occupation of Carlisle, by George G. Monsey.

THE WOMEN ARE A’ GANE WUD.[60]

    The women are a’ gane wud,
      Oh, that he had biden awa’! 
    He ’s turn’d their heads, the lad,
      And ruin will bring on us a’. 
    George was a peaceable man,
      My wife she did doucely behave;
    But now dae a’ that I can,
      She ’s just as wild as the lave.