BONNIE GASCON HA’.
Lane, on the winding Earn
there stands
An unco tow’r,
sae stern an’ auld,
Biggit by lang forgotten hands,
Ance refuge o’
the Wallace bauld.
Time’s restless fingers
sair hath waur’d
And rived thy
gray disjaskit wa’,
But rougher hands nor Time’s
hae daur’d
To wrang thee,
bonnie Gascon Ha’!
Oh, may a muse unkent to fame
For this dim greesome relic sue,
It ‘s linkit wi’ a patriot’s
name,
The truest Scotland ever knew.
Just leave in peace each mossy
stane
Tellin’ o’ nations’ rivalry,
An’ for succeeding ages hain
Remains o’ Scottish chivalry.
* * * * *
What though no monument to thee
Is biggit by thy country’s hand;
Engraved are thy immortal deeds
On every heart o’ this braid land.
Rude Time may monuments ding doun,
An’ tow’rs an’ wa’s
maun a’ decay;
Enduring, deathless, noble chief,
Thy name can never pass away!
Gi’e pillar’d
fame to common men,—
Nae need o’
cairns for ane like thee;
In every cave, wood, hill,
and glen,
“WALLACE”
remember’d aye shall be.
THE AULD HOUSE.
Oh, the auld house, the auld
house!
What though the
rooms were wee?
Oh, kind hearts were dwelling
there,
And bairnies fu’
o’ glee!
The wild-rose and the jesamine
Still hang upon
the wa’;
How mony cherish’d memories
Do they, sweet
flowers, reca’!
Oh, the auld laird, the auld
laird!
Sae canty, kind,
and crouse;
How mony did he welcome to
His ain wee dear
auld house!
And the leddy too, sae genty,
There shelter’d
Scotland’s heir,
And clipt a lock wi’
her ain hand
Frae his lang
yellow hair.
The mavis still doth sweetly
sing,
The blue bells
sweetly blaw,
The bonnie Earn ’s clear
winding still,
But the auld house
is awa’.
The auld house, the auld house,
Deserted though
ye be,
There ne’er can be a
new house,
Will seem sae
fair to me.
Still flourishing the auld
pear tree
The bairnies liked
to see,
And oh, how aften did they
speir
When ripe they
a’ wad be!
The voices sweet, the wee
bit feet
Aye rinnin’
here and there,
The merry shout—oh!
whiles we greet
To think we ’ll
hear nae mair.
For they are a’ wide
scatter’d now,
Some to the Indies
gane,
And ane, alas! to her lang
hame;
Not here we ’ll
meet again.
The kirkyaird, the kirkyaird,
Wi’ flowers
o’ every hue,
Shelter’d by the holly’s
shade,
An’ the
dark sombre yew.