Causa huius Convocationis est, Academici, ut, si vobis placuerit, in virum Honorabilem Theodorum Roosevelt, Civitatum Foederatarum Americae Borealis olim Praesidentem, Gradus Doctoris in Iure Civili conferatur honoris causa; ut Praelectio exspectatissima ab eodem, Doctore in Universitate facto novissimo, coram vobis pronuncietur; necnon ut alia peragantur, quae ad Venerabilem hanc Domum spectant.

Placetne igitur Venerabili huic Convocationi ut in virum Honorabilem Theodorum Roosevelt Gradus Doctoris in Iure Civili conferatur honoris causa?

Placetne vobis, Domini Doctores?  Placetne vobis, Magistri?

* * * * *

To the Bedels.

Ite, Bedelli!  Petite Virum Honorabilem!

* * * * *

The Chancellor to the Vice-Chancellor, as Mr. Roosevelt takes his place for presentation.

    Hic vir, hic est, tibi quem promitti saepius audis,
    Cuius in adventum pavidi cessere cometae
    Et septemgemini turbant trepida ostia Nili!

* * * * *

PRESENTATION SPEECH by DR. HENRY GOUDY, Regius Professor of Civil Law, Fellow of All Souls College.

Insignissime Cancellarie!

Vosque Egregii Procuratores!

Saepenumero mihi et antea contigit plurimos e Republica illa illustri oriundos, affines nostros, vobis praesentare gradum honorarium Doctoris in Iure Civili accepturos, inter quos vel nomina praestantissimorum hominum citare in promptu esset.  Neque tamen quemquam vel suis ipsius meritis vel fama digniorem, qui hoc titulo donaretur, salutavi quam hunc virum quem ad vos duco.

Batavorum antiqua stirpe ortus, sicut et nomen ipsius inclitum indicat, Americanae patriae germanum civem sese praestitit; in qua nemo sane laudem maiorem Reipublicae suae suorum iudicio contulisse creditur.

Tardius quidem ad Britannos fama nominis inclaruit, imprimis tum quum certamine inter Hispanos atque suos orto alae Equitum praefectus rei militaris sese peritissimum ostentabat.  Huic autem, omnia scire ardenti, nulla pars humanitatis supervacua aut negligenda videbatur.  Manifesto quippe declaravit, ut cum poeta loquar: 

    “Non sibi sed toti genitum se credere mundo,”

atque exinde annales non tantum patriae suae sed totius terrarum orbis exemplo virtutis implere.

Quippe bis Hercule! in locum amplissimum Praesulis Reipublicae suae electus egregio illo in statu ita se gerebat ut laudes et nomen magni illius antecessoris, Abraham Lincoln, vel aequipararet—­quorum alter servitudinem, alter corruptionem vicit.  Unde et spem licet concipere ut viro bis summum civitatis honorem adepto accedat et denuo idem ille honor terna vice, numero auspicatissimo, numerandus.

Fortem hospitis nostri animum et tenacem propositi novimus; felicitati et otio non modo suorum sed etiam gentium exterarum consuluit:  bellator ipse atque idem pacis omnibus terrae gentibus firmandae auctor indefessus, sicut et exemplum illustre praebuit nuper foedere icto post bellum inter Iapones et Scytharum populos gestuni.  Neque idem pacem veram esse iudicavit, nisi quae iustitiae et ipsa inniteretur; quippe civitates laude dignas negavit quibus nee in se ipsis constaret fides et animi magnitudo.